Official transcript of HRH The Princess Regent’s opening speech at Parliament

HRH The Princess Regent at the Opening of Parliament.

TAPU mo e ‘Afio ‘a e ‘Otua Mafimafi ‘i hotau lotolotonga. Tapu mo e ‘Eiki Sea ‘o e Fale Alea, tapu mo e Hou’eiki Fakafofonga Nopele, Tapu mo e ‘Eiki Palemia, kae’uma’ā ‘a e Hou’eiki Minisitā ‘o e Kapineti. Tapu mo e kau Fakafofonga ‘o e Kakai. Tapu pea mo e Hou’eiki ‘o e Fonuá, kae’uma’ā ‘a e kainga Tonga kotoa pē, ‘oku a’u atu ki ai ‘a e ouau mahu’inga ‘o e pongipongi ni.

‘Oku tau fakafeta’i ki he ‘Otua Mafimafi ‘i he fakalaolao ‘a e me’a kotoa pē, kae faingamālie ke tau fakataha heni he pongipongi ni. ki hono huufi ‘o e ‘uluaki fakataha ‘a e Fale Alea ‘o Tongá, hili ‘a e fili Fale Alea ‘o e ‘aho 25 ‘o Novema ‘o e ta’u kuohilí. Ko e ngāue ko ení ‘oku fakahoko he ‘aho ní, ko e fakakakato ai pē ‘a e fiema’u ‘a e fakalelei fakapolitikalé, ‘oku tu’utu’uni ‘e he lao ‘o e Fale Alea. ‘Oku fiema’u ai ke ui ha fakataha ‘a e Fale Alea ki mu’a, ‘i he ‘osi ‘a e uike ‘e 6 hili ‘a e ma’u ‘a e ola ‘o e fili Fale Alea. Ko e ouau huufi ‘o e ‘aho ní, ‘oku fakalotofale pē, ka ‘e toki fakahoko ‘a e huufi fakapule’anga ‘o e Fakataha Fale Aleá lolotonga ‘a e mahina ko Mē ‘o e ta’u ni.

Ko e ‘uluaki fatongia ‘o e fakataha ko ení, ko hono fakafuakava’i ‘o e Hou’eiki Minisitā ‘o e Kapineti pea pehē foki ki he Hou’eiki Fakafofonga Nopele, pea mo e kau Fakafofonga ‘o e Kakai. ‘E hoko atu leva ‘a e Fale ki hono vakai’i ‘o ha ngaahi fatongia, kuo tuku mai mei he Pule’anga. ‘Oku tau ‘amanaki foki ‘e ‘ikai ma’uloloa ‘a e fakataha ko ‘ení, he ‘oku fiema’u ‘a e taimi lahi mo fe’unga ke fai ai ‘a e teuteu ki he fakataha ‘i Mē.

Na’e tokangaekina ‘e he Tonga kotoa pē, ‘o tatau pe ‘i Tonga ni pea mo muli foki ‘a e ngaahi fakalakalaka pea mo e ngaahi lakanga ko e fakalelei fakapolitikale, ‘a ia na’e fakakakato’aki ‘a e Fili Fale Alea ‘o e 2010. Ko e ngaue lahi ‘eni ki he Pule’anga mo e Fale Alea, ‘a hono vakai’i pea mo fakalelei ‘a e Konisitutone, pea mo e ngaahi lao ‘oku fekau’aki pea mo hono fokotu’utu’u ‘o e ngaahi mafai ki he Fakataha Tokoní, Kapinetí, Fale Alea, mo e Fakamaau’anga, mo fokotu’u foki ‘a e founga fili fakafofonga Fale Alea ‘e maau mo fakafiemalie.

‘Oku ou fie fakamālō ai heni ki he Pule’angá, mo e Fale Alea ‘o e ta’u kuohilí, ‘i he ngaue lahi mo ‘aufuatō kuo nau ikuna. ‘E tohi tongi ‘i he loto ‘o e Tonga kotoa ‘i he ngaahi to’utangata ka hoko mai, ‘a e ngāue lahi kuo lava.

‘Oku fakalanga manatu foki ‘a e tou’anga ‘a e Hou’eikí, mo kinautolu ‘i he kuohilí na’a nau fakatoka ‘a e makatu’unga ki he fa’unga ‘o e Pule’anga Faka-Tu’i, Faka-kalisitiane, Fakafonua mo Faka-temokalati. Ko e fakafeta’i’anga ia ‘o e ‘aho ní pea ‘oku tau polepole ai ‘i he langi mama’o ‘a e kuohilí, ‘i hono fa’u ‘a e Konisitutone mo e ngaahi lao, ‘o toki fakalelei pē ke tuha mo taau mo e ta’au ‘a taimí. ‘Oku tau fakafeta’i fiefia ‘i he ‘aho ni, koe’uhí ko e tofa mai ‘o e ngaahi vaa’ihala mei he kuohilí, pea ‘oku tau fononga ai ‘i he tokamālie, ‘o ‘ikai tu’anaki ki ha fakatamaki ‘i he halafononga.

Ko e ‘epoki fo’ou eni ‘i hotau fonua, ‘i he hoko mai ha kau taki fo’ou ‘i he hisitolua hotau fonuá, ke nau ngaue’i ai ‘a e Pule’angá pea mo e Fonuá ‘i he ‘ilo pau ‘e ‘ikai ha toe taha ke kilala hake kitautolu. Kuopau ke fai ‘etau langá ‘e kitautolu pē, pea ‘oku matu’aki mahu’inga ke tau tu’u fakataha, ngāue fakataha mo uouongataha ke langa hake hotau Fonuá, langa hake hotau ngaahi koló, kae tautefito ki he langa hake ‘o e ngaahi famili.

‘Oku ou tui ‘oku tau kau fakataha kotoa pē ‘i he fiefia pea mo e loto māfana, koe’uhí ko e fakahoko hono fetongi ‘o e Pule’angá ‘o fai ‘i he funga ‘o e melino mo e fe’ofo’ofani. Hili ‘a e Fili Fale Alea ‘o e ‘aho 25 ‘o Novema ‘o e 2010, na’e fokotu’u leva ‘a e Pule’anga Fakataimi, ‘o toki fakakakato ‘a e liliu ki he Pule’anga Fo’ou, hili hono fakanofo ‘o e Hou’eiki Minisitā ‘o e Kapineti, ‘i eh ‘aho 29 ‘o tiema, 2010.

‘Oku ou fie fakafofonga heni ‘a e fakamālō mo e loto hounga’ia mo’oni ki he Pule’anga ‘Aositelēlia, Pule’anga Nu’u Sila, Pule’anga ‘o e Lepapulika ‘o  e Kakai ‘o Siainá, Pule’anga Siapaní, pea pehē ki he ngaahi Pule’anga kotoa pē ‘oku nau tokoni mai ‘i he ngaahi tapa kehekehe.

‘Oku pehē foki mo e fakamālō loto hounga’ia mo’oni ki he Pangikē ‘a Mamaní, Pangikē Fakalakalaka ‘a ‘Esia, Pule’anga Fakatahataha ‘o ‘Iulopé, pea mo e ngaahi Kautaha Fakavaha’apule’anga kotoa pē kuo tau fengāue’aki mai mei he kuohilí.

‘Oku ou fie fakamālō foki heni fakataha pea mo ‘eku talamonū ki he ‘Eiki Sea ‘o e Fale Aleá, ‘Eiki Palemia mo e Hou’eiki MInisitā ‘o e Kapientí, Hou’eiki Fakafofonga Nōpele, Kau fakafofonga ‘o e Kakai pea pehē kiate kimoutolu kotoa pē ‘a e kau ngāue ‘o e Fale Alea. ‘Oku ou fakatauange mo e u’amelie te mou fai ho mou tukuingata ke fakakato ‘a e kaveinga kuo mou fataha mai ai ki heni ‘i he ‘aho ní.

‘Oku ou fakatauange foki ‘e toka mai ‘a e Hoifua ‘a e ‘Otua Mafimafi ki he feme’a’aki te  mou faí, pea ‘oku ou ‘ofa atu ‘aupito.

THE REGENT