‘Oku ta sipinga kovi e Sea Fale Alea pea ‘oku tonu ke fakafisi

Tangata’eiki,

 

‘Oku ou kole ke tu’u atu he pepa ‘a ‘eku hoha’a ko ‘eni fekau’aki ‘eni pea mo hotau Fale Alea, ki he ‘enau to’onga ‘oku fai ki he ngaahi me’a ko ia fekau’aki pea mo e Sea ‘o e Fale Alea, Nopele Lasike. Na’a ku lau ho’o pepa peau ongo’i ‘a e ngaahi me’a ni fekau’aki mo e Sea e Fale Alea peau ‘ohovale he ‘ikai fakamo’oni ha fakafofonga ia ki he Tohi Tangi ‘a e kau Faifekau ke fakahifo e Sea e Fale Alea koe’uhi ko ‘ene fakasuva ka ‘oku ne kei mali, pea mo ‘ene fakangaue’i e foha hono fakasuva mo hono tuonga’ane ‘a ia ne fehu’ia.

Kohai ko e (Lasike) keke ha’u ‘o fakafahufahu he Fale Alea ‘o Tonga, ko e Fale Alea ‘o Tonga ‘oku ‘ikai ko ha Fale ia ‘o e Tu’i pe ko e Hou’eiki pe ko ko e. Ko e Fale ia ‘o e kakai he ‘oku alea’i aio fai ai e ngaue ma’ae kakai pea ‘oku fakapa’anga ‘e he kakai e fakalele Fale Alea ‘o Tonga. Koho peito pe ‘o’ou ke fai ai e fa’ahinga to’onga ko ‘en. Ke ke vahe ha taha ke vauniu mo hoka niu, ko e vahe ngaue ki he kau ngaue ‘a e Fale Alea ‘oku ‘i ai hono founga, ka ‘oku ‘ikai keke vahe noa’ia pehe’i.

‘Oku faka’au ke mou fu’u ‘ai’ainoa’ia ‘aupito he ivi e kakai masiva ka e totongi tukuhau e fonua.

‘Oku ta sipinga kovi ‘a Lasike ki he Fale Alea mo e fonua ni pea ‘oku ‘osi totonu kene fakafisi he kuo fu’u lahi e ngaahi me’a ia kuo ‘osi tonu ia ke fakafisi. ‘Oku fu’u ta’efe’unga e ‘ikai ia ke fakafisi pea ‘oku fakahela pea fakapiko ‘a e fa’ahinga me’a pehe ni ia ke tau kei lele ai. ‘Oku faka’ofa e kakai masiva ko ‘eni ko kimautolu e fonua he fa’ahinga taki ta sipinga kovi pehe ni.

‘Oku mau mate he ngaue mo e totongi tukuhau kae ‘ai’ainoa’ia pe Sea ia e Fale Alea mo vahe lahi he ‘emau pa’anga ma’u mamahi ka e ‘ikai pe ke fai ha me’a ia ki ai.

‘Oku pehe ‘a ‘eku Tohi ni mo ‘eku faka’amu ke a’u atu ‘a e faka’amu ko ‘eni ki he Sea loto fefeka ko ‘eni keke fakafisi pea ‘oua teke tukunoa’i e me’a kuo lea atu ki ai e kau Faifekau ko ‘eni kuo nau lea atu kake fanongo lelei ki ai mo fai ki ai he ‘e lelei ange ia kia ko e.

 

Faka’apa’apa atu

Fietokoni

Tongatapu

 

Reader Comments