Alea’i Spartans mo e Marist Apifo’oú hau ‘o e 2012

fa’u ‘e Livi Mafi

NUKU’ALOFA: KUO puka ‘e he ongo timi tu’ukimu’a ‘o e fe’auhi ‘a e Vahe Tongatapú ki he ta’u 2012 hona sea ki he fainoló ,‘aki ‘ena fakapapau’i mo’oni ‘ena hao mai ‘i he semi fainoló ‘i he faka’osinga ‘o e uiké.

Na’e vevela ai ‘a e timi matengata’a ‘a e Sila Peluuá ‘i he semí ‘i he timi hau lolotonga ‘o e fe’auhí ‘a e Marist ‘Apifo’oú pea fakangata ‘e he kau tau Sapa’atá ‘a Fasi Ma’ufanga ‘i he semi faka’osí.

Ko e hala faingata’a mo’oni ki he ongo timí ki he fainoló kae tautefito ki he timi ‘a e Ha’ateiho Spartans neongo na’e ngali faiangata’a e halá he na’e tali mai ‘a e timi iiki mo pakihikihi ‘a Toloá ‘i he kuatá ka na’e fakangata ai pē mo ‘enau misí ‘i he kuatá.

‘Oku mālié foki he ko e ongo timi eni na’a na fakaava ‘a e fe’auhí he ta’u ní pea na’e fiu ‘a e Spartans hono tafi ‘a e faingata’á he na’e mahino ‘a e fakaaoao mo’oni pē ‘a Toloa ia he tau ni.

Ko e sāuni mālie mo mahu’inga eni na’e na’e fai ‘e he Spartans ‘o malava ai ke nau tō mai ki he semi pea a’u mai ai pē ki he fainoló.

‘Oku ‘ikai foki ke fai ha lau ia ki he hau lolotonga ‘o e fe’auhí, ‘a e Marist ‘Apifo’oú he ko e ta’u hokohoko eni ‘e 3 ‘enau ikuna ‘a e fe’auhí pea ko e tu’o fā hokohoko eni ‘enau a’u ki he fainoló.

Kaekehe ‘e toki veteki kotoa eni ki Teufaiva he Tokonakí pea ‘oku ‘amanekina ko ha tau milimili sino mo’oni mo fefeka ‘e ‘i ai ‘a e ongo timi hōhoa tatau mo pauni mamafa ko ení.